Sinoptiklər bazar günü Türkiyənin məşhur kurort şəhəri olan Antalyada gözlənilən güclü leysan yağışları, ərazilərin su altında qalması riski və burulğanların formalaşma ehtimalı ilə bağlı xəbərdarlıq ediblər.

Müvafiq xəbərdarlıq regionun Meteorologiya İdarəsi və valilik tərəfindən birgə yayımlanıb.

Proqnozlara əsasən, bazar günü intensiv yağıntılar gözlənilir. Yağışlar ildırım-şimşək, dolu, güclü və ani külək, eləcə də lokal burulğanlarla müşayiət oluna bilər ki, bu da qəfil subasmaların ehtimalını xeyli artırır.

Məlumatda qeyd olunur ki, dekabrın 21-i səhər saatlarından etibarən Antalyanın mərkəzi rayonlarında, həmçinin Kaş, Demre, Finike, Kumluca, Elmalı, Korkuteli, Kemer, Serik və Manavqat bölgələrində güclü yağışlar proqnozlaşdırılır. Yerli hakimiyyət orqanları sakinləri təhlükəsizlik tədbirlərinə ciddi əməl etməyə çağırıb.

Qurumdan bildirilib ki, leysan yağışların səbəb ola biləcəyi qəfil daşqınlar, ildırım zərbələri, burulğanlar, dolu və şiddətli külək kimi təhlükəli halların mümkünlüyünü nəzərə alaraq, vətəndaşlar və aidiyyəti xidmətlər maksimum diqqətli və ehtiyatlı olmalıdırlar.