Dünyaca məşhur Ayasofya məscidinin əsas günbəzi böyük layihə çərçivəsində altı əsrdən sonra ilk dəfə bərpa olunacaq.

Bu barədə Türkiyənin mədəniyyət naziri Mehmet Nuri Ersoy "X" sosial media hesabında paylaşım edib.

"Ayasofya məscidinin günbəzi zəlzələlərə daha davamlı olması üçün gücləndiriləcək", - nazir bildirib.

O, bərpa işləri zamanı məbəddə xidmətlərin davam etdiriləcəyini də vurğulayıb.

Layihənin rəhbəri Əhməd Güleç jurnalistlərə bildirib ki, məscidin baş günbəzinin bərpası ilk belə iş olacaq. Qədim mozaikalara zərər verməmək üçün iş ehtiyatla aparılacaq. Günbəz polad konstruksiya ilə möhkəmləndiriləcək, içərisinə 43,5 metr hündürlüyündə dörd sütun üzərində metal platforma quraşdırılacaq.

Daha əvvəl məlum olmuşdu ki, Ayasofya məscidinə giriş əcnəbi vətəndaşlar üçün ödənişli olaraq qalacaq. Türkiyə vətəndaşları üçün giriş pulsuzdur.