Tədqiqatçılar müəyyən ediblər ki, qaynadılmış su sağlamlıq baxımından filtrdən keçirilmiş sudan daha zərərli ola bilər. Bunun səbəbləri açıqlanıb. Sürixdən olan isveçrəli alimlər araşdırma apararaq qaynadılmış su ilə bağlı mövcud məlumatları sistemləşdiriblər və onun zərərli hesab edilməsinin səbəblərini təhlil ediblər.

Mütəxəssislər geniş yayılmış mifləri təkzib edərək qaynadılmış suyun istifadəsi ilə bağlı hansı risklərin həqiqətən mövcud olduğunu izah ediblər.

Suyun qaynadılması və bakteriyaların məhv edilməsi

Belə hesab olunur ki, suyun qaynadılması bütün zərərli bakteriya və virusları məhv edir. Lakin bu fikir yalnız qismən doğrudur. Əslində, xəstəlik törədən mikroorqanizmlərin əksəriyyəti yüksək temperaturda məhv olur. Bununla belə, məqalədə bildirilir ki, bu, yalnız su uzun müddət qaynadıldıqda baş verir. Su sadəcə qaynama həddinə çatdırılıb dərhal söndürüldükdə bakteriyaların əhəmiyyətli hissəsi sağ qala bilər.

Bundan əlavə, bəzi mikroorqanizmlər, məsələn, bakteriya sporları qısamüddətli qaynamaya davam gətirərək həyat qabiliyyətini saxlaya bilir. Beləliklə, suyun bir dəfə qaynadılması onun tamamilə dezinfeksiya olunmasına zəmanət vermir.

Zərərli birləşmələrin yaranması

Qaynadılmış suya qarşı irəli sürülən digər arqument qızdırılma zamanı baş verən kimyəvi reaksiyalarla bağlıdır. Kran suyunun dezinfeksiyası üçün çox vaxt xlordan istifadə edilir. Məqalədə qeyd olunur ki, qaynama zamanı xlor üzvi birləşmələrlə reaksiyaya girərək trihalometanlar kimi potensial zərərli maddələr əmələ gətirə bilər. Bu birləşmələr qaraciyərə, böyrəklərə və sinir sisteminə mənfi təsir göstərə bilər.

Çaydanda yaranan ərp və onun sağlamlığa təsiri

Suyun qaynadıldığı çaydanın və ya qazanın divarlarında zamanla ərp əmələ gəlir. Məqalədə bildirilir ki, bu, sadəcə zərərsiz çöküntü deyil. Onun tərkibində kalsium, maqnezium, dəmir və digər maddələrin duzları olur. İddia edilir ki, belə qarışıqlar olan suyun uzun müddət istifadəsi həmin maddələrin orqanizmdə toplanmasına, böyrək daşlarının yaranmasına, oynaq problemlərinə və ürək-damar xəstəliklərinə səbəb ola bilər.

Faydalı mineralların itirilməsi

Qaynadılmış suyun tərkibindəki faydalı mikroelementlərin müəyyən hissəsi azalır. Maqnezium, kalsium və digər vacib mineralların bir qismi çöküntü şəklində ayrılır. Nəticədə suyun mineral tərkibi dəyişir. Məqalədə qeyd olunur ki, belə suyun müntəzəm istifadəsi, xüsusilə insan qida vasitəsilə kifayət qədər mineral qəbul etmədikdə, orqanizmdə su-duz balansının pozulmasına səbəb ola bilər.

Suyu necə təhlükəsiz etmək olar?

Qaynadılmış suyun mümkün zərərlərini minimuma endirmək üçün bir neçə tövsiyəyə əməl etmək məsləhət görülür.
1. Qaynatmazdan əvvəl filtrdən keçirmək. Filtrlərdən istifadə xlorun, ağır metalların və mexaniki çirklərin sudan təmizlənməsinə kömək edir.
2. Suyu təkrar qaynatmamaq. Təkrar qaynama zamanı bəzi zərərli maddələrin konsentrasiyası arta bilər.
3. Keyfiyyətli çaydanlardan istifadə etmək. Ərpsiz, şüşə və ya paslanmayan poladdan hazırlanmış çaydanlara üstünlük vermək tövsiyə olunur.
4. Alternativ təmizləmə üsullarını seçmək. Aktivləşdirilmiş karbon filtrləri, əks-osmos və ultrabənövşəyi şüalarla təmizləmə suyun qaynadılmadan təmizlənməsi üçün effektiv üsullar hesab olunur. Beləliklə, suyun qaynadılması onun təmizlənməsi üçün ideal üsul hesab edilmir. Məqalədə mümkün zərərlərdən qorunmaq üçün əlavə filtrasiya üsullarından istifadə etmək və eyni suyu dəfələrlə qaynatmamaq tövsiyə edilir.