Tatu mürəkkəbi yalnız dəridə qalmır, onun bir hissəsi limfa sistemi vasitəsilə limfa düyünlərinə yayılaraq uzunmüddətli sağlamlıq riskləri yarada bilər.

Bu barədə "Science Alert" nəşri yazıb.

Alimlərin sözlərinə görə, tatu boyalarının tərkibində avtomobil boyaları və plastik sənayesində istifadə olunan bəzi piqmentlər, həmçinin az miqdarda nikel, kobalt, xrom və nadir hallarda qurğuşun kimi ağır metallar ola bilər.

Bu maddələr bəzi insanlarda allergiya, xroniki iltihab və immun sisteminin həddindən artıq reaksiyasına səbəb ola bilər. Xüsusilə qırmızı, sarı və narıncı rəngli tatu boyaları daha çox qaşınma, şişkinlik və qranuloma adlanan kiçik düyünlərin yaranması ilə əlaqələndirilir.

Tədqiqatçılar bildirir ki, bəzi piqmentlər günəş şüaları və ya lazerlə silinmə zamanı parçalanaraq laboratoriya şəraitində xərçəng riski ilə əlaqələndirilən maddələr əmələ gətirə bilər. Bununla belə, tatuların insanlarda birbaşa xərçəng yaratdığını təsdiqləyən qəti sübut hələ yoxdur.

Mütəxəssislər əlavə edir ki, tatu etdirmək dəri baryerini pozduğu üçün gigiyena qaydalarına əməl olunmadıqda bakterial infeksiyalar və B və C hepatiti viruslarına yoluxma riski də artır. Onların fikrincə, tatu boyalarının uzunmüddətli təsirlərini qiymətləndirmək üçün daha geniş araşdırmalara ehtiyac var.