Gələcəyin əmək bazarında ən çox qiymətləndiriləcək keyfiyyətlər

Süni intellekt texnologiyalarının sürətli inkişafı bir çox insanı iş yerlərini itirmək ehtimalı ilə narahat edir. Lakin karyera analitiki Benjamin Todd hesab edir ki, yaxın on ildə məhz maşınların əvəz edə bilməyəcəyi bacarıqlara malik mütəxəssislər daha çox tələb olunacaq. 

Bu barədə "unilad.com" nəşri yazıb. 

1. Güclü ünsiyyət və etibarlı münasibətlər qurmaq

Ekspertin fikrincə, süni intellektin yaratdığı məzmun artdıqca informasiyanın özü əvvəlki dəyərini itirəcək. Əvəzində insanlarla etibarlı münasibətlər qurmaq, tapşırıqları düzgün izah etmək və əldə olunan nəticələri obyektiv qiymətləndirmək daha vacib olacaq.

2. Emosional intellekt

Mütəxəssis qeyd edir ki, süni intellekt insan empatiyasını və səmimi dəstəyi tam şəkildə əvəz edə bilmir. Başqalarının hisslərini anlamaq, münaqişələri həll etmək və komandada işləmək gələcəkdə də insanların əsas üstünlüklərindən biri olacaq.

3. Liderlik və strateji qərarlar vermək

Benjamin Todd bildirir ki, qeyri-müəyyən şəraitdə məsuliyyət daşımaq və strateji qərarlar qəbul etmək hələ də insan rəhbərlərinin əsas üstünlüyüdür. Süni intellekt gündəlik işləri sürətləndirsə də, son qərarı yenə insan verir.

4. Böhranların idarə olunması

Ekspertin sözlərinə görə, mürəkkəb və gözlənilməz problemlərin həlli çevik düşüncə və praktiki təcrübə tələb edir. Süni intellekt standart prosesləri avtomatlaşdıra bilər, lakin qeyri-adi vəziyyətlərdə insan müdaxiləsinə ehtiyac qalacaq.

5. Süni intellektlə işləməyi bacarmaq

Todd hesab edir ki, süni intellektə rəqib kimi yox, köməkçi alət kimi yanaşmaq lazımdır. Onun fikrincə, gələcəkdə işəgötürənlər yeni texnologiyalardan səmərəli istifadə etməyi bacaran mütəxəssislərə üstünlük verəcəklər. Buna görə də neyroşəbəkələrlə işləməyi öyrənmək əmək bazarında mühüm üstünlük hesab olunacaq.