Finlandiya səmasında gərginlik pik həddə çatıb. Hakim Milli Koalisiya Partiyasından olan deputat Yarno Limnela ölkənin hava sərhədlərinin pilotsuz uçuş aparatları (PUA) tərəfindən pozulmasının artıq "qaçılmaz" olduğunu bəyan edib.

Bu barədə deputat "X" sosial şəbəkə hesabında paylaşım edib.

Limnela vurğulayıb ki, hazırkı yüksək hücum intensivliyi və dronların dayandırılmayan fəaliyyəti fonunda bu cür insidentlərin təkrarlanması Finlandiya üçün yalnız zaman məsələsidir.

Bu kəskin bəyanat Finlandiya Müdafiə Nazirliyinin Rusiya Federasiyası ilə sərhəd yaxınlığında naməlum bir dronun aşkarlandığını elan etməsindən sonra səslənib. Baş vermiş hadisə rəsmi Helsinkini hərəkətə keçirib.

Məsələ ilə bağlı Finlandiyanın Baş naziri Petteri Orpo dərhal Ukrayna lideri Vladimir Zelenski ilə əlaqə saxlayıb. Orpo söhbət zamanı bu cür hərəkətlərin qətiyyən qəbul edilməz olduğunu bildirib və oxşar halların dərhal dayandırılmasını tələb edib.