Ermənistanın paytaxtında keçirilən Avropa Siyasi Birliyinin sammitində çıxış edən Fransa Prezidenti Emmanuel Makron son illərdə ölkədə baş verən əhəmiyyətli siyasi dəyişiklikləri qeyd edib.

Onun sözlərinə görə, Ermənistanın transformasiyası beynəlxalq ictimaiyyət üçün aydın olub.

"Düzünü desək, səkkiz il əvvəl bura heç kim gəlməzdi. Səkkiz il əvvəl bu ölkə danışıqlar masasında faktiki olaraq Rusiyanın peyki hesab olunurdu. Bu gün ölkənizə bu qədər səfərlər görməyimiz çox şeydən xəbər verir", - Makron bildirib.

Fransa lideri vurğulayıb ki, Ermənistan əvvəllər bir çoxları tərəfindən Rusiyanın faktiki müttəfiqi kimi qəbul edilirdi, lakin "məxməri inqilab"dan sonra ölkənin kursu dəyişib.

O, ölkənin istiqamətini dəyişdirən, sülhə və Avropaya inteqrasiyaya üstünlük verən Baş nazir Nikol Paşinyanın rolunu qeyd edib.

Makron həmçinin Ermənistanda baş verən dəyişiklikləri Avropadakı daha geniş proseslərlə, o cümlədən Ukraynadakı müqavimət və regionun digər ölkələrində islahatlarla əlaqələndirib. O qeyd edib ki, "Ukraynadakı hadisələr, Ermənistanın strategiyası, Moldovada və digər ölkələrdə baş verən proseslər göstərir ki, biz avropalılar son illərdə oyanış və birlik lehinə seçim etmişik".

Fransa Prezidenti vurğulayıb ki, Avropada strateji muxtariyyət arzusu bu ümumi kursun və Avropa birliyinin möhkəmlənməsinin əksidir.