Flinders Universitetinin tədqiqatçıları müəyyən ediblər ki, genetik materialın qapalı molekulları olan dairəvi RNT-lər DNT-yə müdaxilə edərək xərçəngə səbəb ola biləcək mutasiyalara səbəb ola bilir.

Işin nəticələri "Cancers" jurnalında dərc olunub.

Eksperiment zamanı mütəxəssislər yeni doğulmuş körpələrdən qan nümunələrini tədqiq ediblər, onların bəzilərində sonradan leykemiya aşkarlanıb. Bu körpələrdə müəyyən növ dairəvi RNT səviyyəsi sağlam uşaqlardan xeyli yüksək olub.

Alimlər izah ediblər ki, dairəvi RNT-lər DNT ilə qarşılıqlı əlaqədə ola bilər və bu, normal hüceyrə proseslərini pozan genetik dəyişikliklərə səbəb olur. Bu molekullar terminal nukleotidlər arasındakı kovalent bağlar hesabına əmələ gəlir ki, bu da onları məhv olmağa davamlı edir.

Tədqiqatın həmmüəllifi Vanessa Conn qeyd edib ki, dairəvi RNT-lər genom üzərində mənfi təsirləri gücləndirərək kompleks strukturlar əmələ gətirməyə qadirdir. Onların mexanizmlərinin başa düşülməsi xərçəngin, eləcə də RNT funksiyasının pozulması ilə əlaqəli digər xəstəliklərin diaqnostikası, qarşısının alınması və müalicəsi üçün yeni metodların inkişafına səbəb ola bilər.