İş tapmaqda çətinlik çəkən qadınlar üçün yeni dövlət layihəsinə start verilib.

Layihə Dövlət Məşğulluq Agentliyi tərəfindən həyata keçirilən "Zərif iş gücü" layihəsidir.

Layihənin əsas məqsədi uzun müddət əmək bazarından kənarda qalan, iş tapmaqda çətinlik çəkən və iqtisadi müstəqilliyini artırmaq istəyən qadınların məşğulluğuna dəstək olmaqdır.

Layihə çərçivəsində xüsusilə həssas kateqoriyaya aid olan qadınlara üstünlük veriləcək. Onlara şəhid ailələrinin üzvləri, sosial müavinət alanlar, eləcə də müxtəlif səbəblərdən əmək bazarından uzaq düşmüş qadınlar daxildir.

Layihəyə qoşulmaq istəyən qadınlar əvvəlcə qeydiyyatdan keçməlidirlər. Daha sonra onlar müsahibəyə dəvət olunacaq. Müsahibə mərhələsini uğurla keçən iştirakçılar peşə təlimlərinə cəlb ediləcək, karyera məsləhət xidmətlərindən yararlanacaq və iş tapmaq imkanlarını artıracaqlar.

Qeydiyyat 15 aprel tarixinədək davam edəcək.